Myndugleikarnir í Nepal hava skrásett 359 deyð eftir vanlukkuna, sum rakti marknaøkið mikudagin. Í Tibet eru trý fólk staðfest deyð.
Tað upplýsa løgreglan í Nepal og kinesiskir statsmiðlar sambært tíðindastovuni AFP.
Upptøkur úr einum av raktu økjunum vísa ovurstórar mongdir av vatni og runu, sum við miklari megi raka bygningar, vegir, bussar og bilar.
Sambært amerikanska jarðfrøðistovninum USGS rapaði ein jøkul í Himalajafjøllunum undan skriðulopinum. Tað sendi eina ógvusliga skriðu av ísi og gróti niður gjøgnum ánna Lhende Khola í fjallalendinum við markið.
##med2##
Hetta elvdi til skriðulop og vatnflóð báðumegin markið.
Tá jøkulin rapaði, elvdi tað eisini til skjálvtar í undirgrundini. Fyrst helt USGS, at talan var um ein jarðskjálvta, sum varð máldur til 4,4.
Fleiri enn 1.000 saknað
Hósdagin eru fleiri enn 1.000 fólk framvegis saknað í Nepal og Tibet.
Millum tey saknaðu eru ferðafólk úr fleiri londum, teirra millum India, Avstralia, Bretlandi, Malaysia, Niðurlondum, Portugal, Suðurafrika, Suðurkorea og USA.
Danska uttanríkisráðið sigur við Ritzau, at tað ikki hevur kunnleika til, at danskir ríkisborgarar eru millum tey saknaðu.
Sambært AFP ferðaðust skriðulopið og vatnflóðin næstan 170 kilometrar gjøgnum Nepal.
Tibetanski andaligi leiðarin Dalai Lama, sum livir í útlegd í India, sigur í einari fráboðan, at hann fer at biðja fyri øllum teimum, sum hava latið lív.
Tibet hevur verið undir kinesiskum valdi síðani 1951. Eftir eina miseydnaða uppreistur í 1959 flýddi Dalai Lama saman við mongum øðrum tibetanum til India.
/Ritzau/
