Móttøka var í dag á Biskupstøð í Klaksvík í samband við, at Betri samtakið letur eina millión krónur til »Áhugafelagið Nólsoyar Páll«, hetta sum liður í at endurreisa húsið Nólsoyar Páls.
Áhugafelagið Nólsoyar Páll varð stovnað í 2013, har endamálið var at seta merkismanninum Nólsoyar Páll eitt virðiligt minnismerki í Klaksvík. Síðani hevur arbeiðið við at endurreisa húsini hjá Nólsoyar Páll gingið væl.
Albert Isfeldt, arkitektur, er tekniskur ráðgevi, meðan Archiebald Black er verkætlanaraleiðari.
Archiebald Black, sum samstundis er formaður í áhugafelagnum, sigur soleiðis um tjóðarhetjuna:
– Vit hava øll tørv á hetjum og fyrimyndum, og fyri mong okkara er hetta Nólsoyar Páll. Hann er uttan iva millum mætastu, djarvastu og vitugasti fólkini, sum land okkara hevur fostrað.
Formaðurin í áhugafelagnum heldur fram.
– Uttan stóru gávuna frá Betri P/F og øllum teim mongu stuðlum, hevði ikki verið møguligt at fullført hesa stóru verkætlan. Vit kunnu ikki annað enn fegnast um, at vit hava feløg so sum Betri, ið vísa søguni ans og virðing fyri okkara felags mentan.
Birgir Nielsen, nevndarformaður í Betri P/F, helt røðu við samkomuna, sum var við húsinum hjá Nólsoyar Páll á Biskupstøð, sum júst í hesi løtu eru um at verða reist.
Hann legði afturat:
– Vit í nevndini fegnast um møguleikan at stuðla verkætlanum sum hesari. Við undangongufólkum, sum hesum, ið lata hús Nólsoyar Pálls endurbyggja, er okkara mentanararvur og søga í tryggum hondum. Tí stuðla vit fegin arbeiðinum at fullfíggja hesa verkætlan, ið vit meta kemur øllum landinum til góðar.
Nólsoyar Páll, sum hevði havt 250 ára føðingardag í 2016, bygdi bóndagarðin á Biskupsstøð fyrst í 1800. Mett verður, at húsini hjá Nólsoyar Páll verða liðug endurbygd í 2018.
