Russiski forsetin, Vladimir Putin, hevur givið boð um at steðga álopum á ukrainska høvuðsstaðin Kyiv í tríggjar dagar.
Steðgurin verður settur í verk í sambandi við vitjanina hjá eini amerikanskari sendinevnd, upplýsir talsmaðurin hjá Kreml, Dmitrij Peskov, sambært russisku tíðindastovuni Interfax.
Amerikonsku serligu sendimenninir Steve Witkoff og Jared Kushner komu til Moskva á middegi í dag.
Væntað verður, at teir eisini fara til Ukraina um vikuskiftið.
Ukrainski forsetin, Volodymyr Zelenskyj, hevur longu boðað frá, at Ukraina ikki fer at fremja loftálop á Russland, meðan amerikanararnir eru í Moskva.
Donald Trump, forseti í USA, segði fríggjadagin, at Witkoff og Kushner fara til bæði Russland og Ukraina við eini ætlan, sum hevur til endamáls at fáa enda á krígnum.
Diplomatisku royndirnar at fáa friðarsamráðingar í gongd hava staðið í stað í fleiri mánaðir. Samstundis halda bardagarnir fram við hermótinum, og Russland hevur framt stór álop á ukrainskar býir. Ukraina hevur eisini økt um álopini inni í Russlandi.
/Ritzau/
