Ætlanin ljóðaði upp á 218 milliónir krónur. Tórshavnar kommuna hevur játtað at rinda helmingin, 109 milliónir krónur.
Í dag hava teir báðir, Niels Mortensen og Tummas Justinussen, sum hava verið úti og leitað eftir privatari fígging, verið á fundi við borgarstjóran, og í samrøðu við sjónvarpið váttaði Niels Mortensen, at teir hava funnið tær 109 milliónir krónurnar, sum teir fóru eftir.
Men nú eru príshækkingar allastaðni, og tí eru tey í býráðnum komin til ta niðurstøðu, at høllin verður 25 milliónir dýrari at byggja. 25 milliónir, sum teir grunnar, sum hava játtað pengar, ikki eru sinnaðir at rinda, men sum Tórshavnar Kommuna helst má rinda.
Heðin Mortensen, borgarstjóri, segði við sjónvarpið í kvøld, at kommunan fer at rinda pengarnar – treytað av at málið verður samtykt á eyka býráðsfundi, sum verður um málið í morgin.