Tórshavnar kommuna hevði eitt avlop á knappar 41 milliónir krónur í 2025.
Tað vísir uppgerðin hjá Fíggjarmálaráðnum yvir kommunalu roknskapirnar.
Kommunan hevði nettoinntøkur frá skatti á slakar 1,477 milliardir krónur. Nettoútreiðslurnar til rakstur vóru 1,099 milliardir, meðan íløgurnar vóru 325,9 milliónir krónur.
Tá ið rentuútreiðslurnar eru taldar við, endaði roknskapurin við einum avlopi á 41 milliónir krónur.
Klaksvíkar kommuna hevði næststørsta avlopið, 22,1 milliónir krónur. Vága kommuna hevði 7,7 milliónir í avlopi, og Vágs kommuna hevði 4,9 milliónir.
Størsta hallið hevði Runavíkar kommuna við 34,6 milliónum krónum.
Eysturkommuna hevði 25 milliónir í halli, Eiðis kommuna 15,6 milliónir, Fuglafjarðar kommuna 13,9 milliónir og Sunda kommuna 12,7 milliónir krónur.
Allar kommunurnar undir einum høvdu 40,4 milliónir krónur í halli. Uttan avlopið hjá Tórshavnar kommunu hevði samlaða kommunala hallið sostatt verið góðar 81 milliónir krónur.
