– Í kvøld og komandi dagarnar vil eg biðja tykkum taka loftávaringarnar serliga í álvara. Russar hava fyrireikað eitt nýtt umfatandi álop, sigur Zelenskyj í sínari kvøldrøðu, sum er løgd út á sosiala miðilin X.
Ávaringin kemur, eftir at Ukraina hevur rakt mál djúpt inni í Russlandi við langtrøkkandi dronum.
Leygardagin hevur Russland millum annað framt fleiri álop við sokallaðum glíðibumbum.
Í býnum Zaporizjzja eru fýra fólk deyð og seks særd eftir eitt slíkt álop. Tað upplýsir guvernørurin í økinum, Ivan Fedorov, sambært Reuters.
Sambært honum vóru í alt níggju álop framd á býin, og óttast verður, at fólk framvegis liggja føst undir húsaleivdunum.
Fyrr leygardagin leyp Russland eisini á Dnipro-landspartin við langtrøkkandi stórskotum og dronum við spreingievni.
Í minsta lagi níggju fólk vórðu særd í teimum álopunum, sambært hernaðarguvernørinum í Dnipro, Oleksandr Hansha, skrivar tíðindastovan dpa.
Myndatekstur:
Ukrainski forsetin, Volodymyr Zelenskyj, ávarar um, at Russland fyrireikar eitt nýtt stórt álop á Ukraina og heitir á fólk um at taka loftávaringarnar í størsta álvara. Mynd: Handout/Ritzau Scanpix
----
Vance til Sveis við fokus á vápnahvíld at samráðast við Iran
Amerikanski varaforsetin, J.D. Vance, er farin úr Washington við kós móti Sveis, har samráðingar við Iran halda fram.
Tað váttar talsmaður hansara sambært Reuters og AFP í kvøld.
Vance sigur, at hann væntar bert at luttaka í samráðingunum í ein ella tveir dagar.
– Eg vóni, at vit fáa framstig bæði í spurninginum um iranska kjarnorkuskránna og í arbeiðinum at fáa eina vápnahvíld í lag í Libanon, sigur hann sambært Reuters.
Hann leggur afturat, at hetta eru tey bæði týdningarmestu málini hjá USA í løtuni.
Fyrr í dag boðaði Pakistan, sum hevur leiklutin sum semingsmaður millum USA og Iran, frá, at framhaldandi tøkniligar samráðingar verða í Bürgenstock í Sveis í morgin.
Sambært pakistanska uttanríkisráðnum verður talan um tøkniligar samráðingar millum partarnar.
Vance sigur eisini, at amerikonsku samráðingarfólkini hava boðað frá, at gongd er í samráðingunum.
Fyrr í dag boðaði Iran frá, at Hormuz-sundið varð stongt sum svar upp á ísraelsk loftálop í Libanon. Samstundis skuldsetti Iran USA fyri at hava brotið lyftini í semjuskjalinum millum londini.
Ein talsmaður fyri iranska uttanríkisráðið segði, at semjan, sum millum annað skuldi tryggja, at Hormuz-sundið varð latið upp aftur, nú er komin í vanda.
Seint í kvøld upplýstu iranskir miðlar, at iranska sendinevndin var komin til Sveis.
/ritzau/Reuters
