112 ár og 218 dagar. So gomul er Kirsten Schwalbe, sum í dag, mikudagin, skrivar seg inn í søgubøkurnar sum tann danin, ið hevur livað longst nakrantíð.
Men hóast høga aldurin kennir hon seg ikki gamla.
– Nei, tað geri eg í grundini ikki. Tí hvussu er tað at kenna seg gamla? spyr hon í samrøðu við TV MidtVest.
– Eg ímyndi mær, at tá mann er gamal, situr mann bara og lúrir. Eg hugsi als ikki um, at eg sjálv eri gomul, sigur Kirsten Schwalbe.
Hon tekur metið eftir Karlu Lindholm Jensen úr Herning, sum doyði í 2020, 112 ára gomul og 217 dagar.
Kirsten Schwalbe er nú eisini millum tíggju elstu núlivandi fólkini í Evropa.
Sjónin og hoyrnin eru ikki, sum tær hava verið, viðgongur hon. Men hon heldur sjálv, at vitið framvegis er nøkulunda í lagi.
– Eg haldi nú, at mítt vit er nøkulunda í lagi, sigur hon við TV MidtVest.
Ein partur av loyndarmálinum aftan fyri høga aldurin er sambært henni at halda heilan virknan so væl, sum til ber.
Hon heldur eisini, at ílegurnar hava sín leiklut. Fýra av níggju systkjum hennara blivu eisini eldri enn 100 ár, greiddi hon Berlingske frá í 2024.
Harumframt leggur hon dent á gott lag og lívshug sum týðandi fyri eitt langt lív.
Metdagurin verður hátíðarhildin við einari miðmálsmáltíð saman við børnum og abbabørnum. Kirsten Schwalbe hevur tríggjar døtur, sum allar eru eldri enn 80 ár.
Til samanberingar gjørdist elsti kendi føroyingurin, Theodor Thomassen úr Sørvági, 107 ára gamal. Hann varð føddur 28. oktober 1908 og andaðist 9. mars 2016.
Ritzau
