Jóhanna Fossdalsá Sørensen og liðfelagarnir í BK Häcken eru sera nær við at tryggja sær svenska meistaraheitið.

Fríggjakvøldið var Jóhanna við frá dystarbyrjan á fyrsta sinni, tá Häcken á útivølli vann 2-1 á botnliðnum, Växjö. Johanna var á vøllinum í ein tíma, ið er tað mesta higartil í hesum kappingarárinum.

Joy Omewa Ogochukwu skoraði sigursmálið upp á brotsspark heilt móti dystarenda. Alice Broman fekk Häcken á sigurskós í 26. minutti. Rættiliga óvæntað javnaði botnliðið miðskeiðis í seinna hálvleiki, men Häcken yvirvann skelkin.

Häcken er greitt oddalið í deildini við 64 stigum, nú tríggir dystir eru eftir at leika. Hammarby hevur 53 stig, og hevur fýra dystir eftir at leika. Men fær Hammarby ikki fult í grannauppgerðini móti Djurgården seinnapartin klokkan 14, so verður Häcken staðfestur svenskur meistari 2026.

Um Hammarby vinnur á Djurgården kann Häcken staðfesta meistaraheitið á heimavølli mánadagin 2. november klokkan 17. Tá kemur Kristianstad á vitjan.