Seinnapartin í gjár var móttøka í móttøkuhúsinum fyri kórinum Tarira. 

Í oktober luttók Tarira í 6th Kalamata International Choir Competition & Festival í Grikkalandi, har kórið fekk framúr góð úrslit - tvær gullheiðurslønir og ein serstakan heiður fyri tulkingina av Laudibus in Sanctis eftir William Byrd. 

Hetta hevur við sær, at kórið hevur tryggjað sær luttøku í World Choir Games í Eysturríki í juli 2027.

Bernharður Wilkinson er kórleiðari. 

Tað er eitt sera flott avrik, sum tit kunnu vera sera errin av. Tað kemur neyvan av ongum, men má vera úrslitið av miðvísum arbeiði, nógvari venjing og einum kóri, sum hevur sett sær høg mál, segði Elsa Berg, borgarstjóri m.a. í røðu síni.

Komandi ár, í 2027, verður eisini eitt serligt ár fyri Tariru, tá kórið kann hátíðarhalda 25 ár.

Tórshavnar kommuna ynskir Tariru hjartaliga til lukku við flottu úrslitunum, bestu eydnu við fyrireikingunum til World Choir Games og eitt væleydnað 2027.

Hetta skrivar torshavn.fo, og har eru eisini fleiri myndir at síggja.