Í nógv ár hava fólk í Kvívíkar Sløkkiliðið tænt lokalu tilbúgvingini og trygdini væl.
- Í gjár vórðu nøkur av hesum heiðrað á kommunuskrivstovuni. Somuleiðis fingu hesi sløkkiliðsfólkini gávu frá kommununi fyri trúgva tænastu.
Soleiðis verður sagt á heimasíðuni hjá Kvívíkar kommunu í dag.
Í sambandi við løtuna vórðu Leivur Persson og Óli á Grindafløtti frá tilbúgvingarøkinum hjá Vørn komnir norður til Kvívíkar.
- Teir vóru komnir at heiðra teir, ið lúka treytirnar fyri at fáa heiðurstekin frá Føroya Landsstýri. Til løtuna segði Leivur Persson nøkur orð og takkaði sløkkliðsfólkunum fyri drúgva tænastu.
Til løtuna vórðu hesi sløkkiliðsfólkini heiðrað:
Jens Mikkelsen 36 ár og enn í starvi
Frederik Isaksen 36 ár og enn í starvi
Rói Joensen 35 ár og enn í starvi
Petur Müller 26 ár og enn í starvi
Edvard Müller 20 ár og enn í starvi
- Um sløkkiliðsfólk kann sigast, at tá fólk fara inn at krógva seg undan illveðri, so fara hesi út í tænastu, og tá fólk fara út úr eldinum, so fara hesi inn í eldin.
Í Kvívíkar kommunu takka tey øllum sløkkiliðsfólkum fyri arbeiðið, sum tey hvønn dag leggja fyri dagin til tess at tryggja kommununa og lokala fólkið.
