Bæði nýggju Ro-Ro farmaskipini, sum Smyril Line hevur latið bygt í Kina, hava nú verið rakt av óhappum, áðrenn tey eru komin í vanliga sigling hjá reiðarínum.
Í gjár kom eldur í maskinrúmið á Skipanesi, sum tá var á heimferð úr Kina. Eldurin varð sløktur eftir lítlari løtu, og eingin av teimum 23 monnunum umborð fekk skaða. Skipið var tá umleið 20 fjórðingar út fyri Taiwan.
Skipanes fer nú inn á skipasmiðju í Kina til kanningar. Smyril Line sigur, at áðrenn hesar kanningar eru gjørdar, ber ikki til at siga, nær skipið kann halda fram ferðini og fara undir sigling.
Hendingin kemur bert góðari viku eftir, at Smyril Line fekk Skipanes handað frá CIMC Raffles-skipasmiðjuni í Yantai. Skipið varð handað 25. august og fór síðani undir ferðina heim úr Kina.
Men Skipanes er ikki einasta nýbygda skipið hjá reiðarínum, sum hevur verið fyri óhappi.
Systurskipið Akranes var á royndartúri í juni, tá eitt óhapp hendi við aksel-generatorinum. Tað hevði við sær, at eitt størri umvælingararbeiði mátti gerast, og Jens Meinhard Rasmussen, forstjóri í Smyril Line, segði tá, at arbeiðið kundi seinka skipinum fleiri mánaðir.
Akranes og Skipanes eru tvey nýggj Ro-Ro farmaskip, sum Smyril Line hevur latið byggja sum lið í eini størri endurnýggjan og framtíðartrygging av flotanum. Skipanes er fyrra skipið, sum er handað reiðarínum, meðan Akranes framvegis hevur verið seinkað av umvælingararbeiðinum.
Enn er einki alment upplýst um, hvat var orsøkin til eldin umborð á Skipanesi, ella hvussu stórur skaðin er.
Smyril Line hevur sagt, at felagið harmast um nýggja óhappið, men fegnast um, at øll manningin hevur tað gott og eingin fekk skaða.
##med2##
Sambært marinetraffic.com nærkast Skipanes í skrivandi stund Kina við 2,5 míla ferð.
