Fía Selma Nielsen hevur í dag sett Eyðdis Hartmann Niclasen, landsstýriskvinnu, ein skrivligan fyrispurning um rottutýning í Føroyum.
Hon spyr millum annað, um landsstýrið hevur ætlanir um at samskipa rottutýningina saman við kommununum, sum í dag hava ábyrgdina av henni.
– Tað sær ikki út til, at kommunurnar megna uppgávuna at týna rottuna í Føroyum, skrivar Fía Selma Nielsen í viðmerkingunum til fyrispurningin.
Hon vísir á, at rottan kann gera stóran skaða á føroysku náttúruna og serliga fuglalívið. Rotta leggst í fuglabjørg og fuglabøli og etur egg, og sleppur hon framat, kann hon sambært løgtingskvinnuni gera óbótaligan skaða á fuglastovnar.
Fía Selma Nielsen vísir eisini á, at rottan kann gera materiellan skaða, eitt nú á ravmagnsútgerð og spillivatnskipanir, og at hon kann bera sjúkur millum bæði djór og menniskju.
Í Føroyum er tað serliga brúna rottan, sum er ein trupulleiki. Hon nørist skjótt. Sambært viðmerkingunum til fyrispurningin verður hon kynsbúgvin longu 8-12 vikur gomul og kann leggja 2-7 ferðir um árið við 8-10 ungum hvørja ferð.
Løgtingskvinnan heldur kortini, at tað eigur at bera til at seta sær eitt nógv størri mál.
– Fermetratalið í Føroyum er avmarkað. Tí átti at verið gjørligt, til dømis við felags innsatsi millum land og kommunur, at týnt rottuna í Føroyum, skrivar hon.
Hon vil eisini hava landsstýriskvinnuna at greiða frá, hvørja ávirkan rottufríar Føroyar eftir hennara meting høvdu havt á føroysku fuglastovnarnar og á burðardygdina í føroysku náttúruni sum heild.
