Hon hevur sett Bárði á Lakjuni, landsstýrismanni í mentamálum, ein skrivligan fyrispurning um føroyskan limaskap í Erasmus+.

Løgtingskvinnan spyr millum annað, hvørji ítøkilig átøk eru í gongd í miðfyrisitingini, og hvørji átøk enn mangla, um Føroyar skulu gerast partur av skipanini í 2028.

Hon vil eisini hava at vita, um nóg mikið av fíggjarligari og starvsfólkaligari orku er sett av til fyrireikingarnar, og um føroysku útbúgvingarstovnarnir eru klárir at taka ímóti útlendskum lesandi og starvsfólki og at senda føroysk lesandi og starvsfólk av landinum gjøgnum Erasmus+.

Erasmus+ er ein týðandi partur av evropeiska samstarvinum um útbúgving. Skipanin gevur lesandi, starvsfólki og útbúgvingarstovnum møguleika at taka lut í lestraruppihaldum, starvsfólkaskiftum og fakligum samstarvi tvørtur um landamørk.

Føroyar eru í dag ikki knýttar at Erasmus+ við atlimaskapi og hava tí ikki sama atgongd til skipanina sum londini, ið eru partur av henni.

Í viðmerkingunum til fyrispurningin vísir Bjørg Brynhildardóttir Egholm á, at Føroyar tvær ferðir hava boðað ES frá, at vit vilja gerast partur av Erasmus+.

Hon heldur, at atlimaskapur hevur stóran týdning, um Føroyar skulu mennast sum lestrarland.

– Tað verður bæði lættari hjá føroyskum lesandi og starvsfólki at fáa altjóða royndir og hjá føroysku útbúgvingarstovnunum at taka ímóti lesandi og starvsfólki úr øðrum londum, skrivar hon.

Núverandi Erasmus+-skeið er frá 2021 til 2027, og eitt nýtt skeið byrjar í 2028. Tí heldur løgtingskvinnan, at tað er umráðandi, at neyðugu politisku, umsitingarligu og fíggjarligu fyrireikingarnar verða gjørdar í góðari tíð.