Sjey fólk eru deyð, eftir at ein tyrla við ferðafólkum datt niður í Samburu-økinum har norðuri í Kenya í morgun.

Sambært kenyanska loftferðslueftirlitinum vóru seks ferðafólk og ein flogskipari umborð. Eingin teirra kom frá vanlukkuni á lívi.

Tyrlan fór úr Loisaba Conservancy og skuldi flúgva til Ewaso Nyiro-økið í Samburu. Hon datt niður klokkan 9.13 lokala tíð í einum fjarskotnum og torførum fjallalendi nærindis Mount Ololokwe.

Fimm av teimum deyðu vóru amerikanskir ríkisborgarar, upplýsir amerikanska uttanríkisráðið. Samleikarnir hjá øllum teimum deyðu eru ikki almannakunngjørdir.

Kenyanski Reyði Krossur og aðrir bjargingarmyndugleikar vórðu sendir á staðið. Bjargingararbeiðið var torført, tí vanlukkustaðið liggur í ósløttum og fjarskotnum lendi.

Tyrlan var av slagnum Eurocopter EC130 B4 og varð nýtt til eina leiguflúgving við ferðafólkum. Myndugleikarnir eru farnir undir at kanna, hví hon datt niður.

Tyrlan var ogn hjá kenyanska felagnum Lady Lori Helicopters, meðan ferðafólkini vóru gestir hjá ferðavinnufelagnum &Beyond, skrivar AP.