Amerikanska løgmálaráðið hevur reist ákærur móti fyrrverandi kubanska forsetanum, Raul Castro.
Tað vísa rættarskjøl, sum vórðu almannakunngjørd mikudagin, sambært tíðindastovuni Reuters.
Raul Castro, sum nú er 94 ára gamal, er skuldsettur fyri fýra ákærur um dráp, tvær ákærur um at oyðileggja flogfør og eina ákæru um samspæl um at drepa amerikanskar ríkisborgarar.
Amerikanski virkandi løgmaðurin, Todd Blanche, sigur, at hann væntar, at Castro kemur til USA "av egnum vilja ella á annan hátt".
Umframt amerikansku stjórnina eru fimm fólk nevnd sum stevnarar, vísa rættarskjøl sambært Reuters.
Amerikanskir miðlar skrivaðu í farnu viku, at USA væntandi fór at ákæra eina hending í 1996, har kubansk jagaraflogfør skutu niður flogfør, sum ein hópur av kubanum í útlegdum, sum hava heimstað í USA, stýrdi.
Kubanska stjórnin hevur áður ført fram, at álopið í 1996 var eitt lógligt svar uppá flogførini, sum gera seg inn á kubanska loftrúmið.
Raul Castro var tá verjumálaráðharri í Kuba.
Í eini fráboðan mikudagin sigur núverandi forsetin á Kuba, Miguel Diaz-Canel, at ákærurnar um tey bæði flogførini, sum vóru skotin niður í 1996, vóru eitt "politiskt stig uttan lógargrundarlag".
Amerikansku ákærurnar eru bert ætlaðar at "leggja afturat málinum, sum teir fabrikkera fyri at rættvísgera galskapin av einum hernaðarligum ágangi móti Kuba", skrivar Diaz-Canel í einum uppslagi á X.
Ákærurnar móti Raul Castro koma í eini tíð, har amerikanski forsetin, Donald Trump, hevur økt trýstið á Kuba undir kommunistaleiðslu.
Trump hevur eisini víst á ynski um skipanarbroyting.
USA hevur í roynd og veru sett stongsil í verk móti Kuba við at hótta við revsitiltøkum móti londum, sum veita brennievni til oynna.
Tað hevur elvt til streymslit og gjørt ringastu kreppuna í landinum í áratíggju enn verri.
Raul Castro tók við sum forseti í Kuba í 2008, eftir at beiggi hansara Fidel gjørdist sjúkur.
Fidel Castro, sum hevði sitið við valdinum síðani eina kollvelting í 1959, doyði í 2016.
Raul Castro legði frá sær sum forseti í 2018, men er framvegis ein máttmikil persónur í kubanskum politikki.
Ákæran móti honum er nýggjasta dømið um, at amerikanska løgmálaráðið undir forsetaembætinum hjá Donald Trump ákærdi politisku mótstøðufólkini hjá Trump bæði innanlands og uttanlands.
Søguliga eru slíkar ákærur sjáldsamar í USA, skrivar Reuters.
Ákæran móti Castro minnir um eitt fyrrverandi rúsevnamál móti fongslaða fyrrverandi forsetanum í Venezuela, Nicolas Maduro, sum er í sambandi við Kuba.
Trump-stjórnin brúkti ákæruna móti Maduro sum grundgeving fyri at senda amerikanskar serdeildir inn í venezuelanska høvuðsstaðin, Caracas, 3. januar.
Maduro varð tikin og fluttur til New York, har hann bíðar eftir rættarmáli. Hann hevur noktað seg sekan.
Trump hótti í mars við, at Kuba "er næst" eftir Venesuela.
Ritzau/Reuters
