Tíðindaskriv:
Býarskáin er stóra heysttiltakið í Runavíkar kommunu, har handilslívið setur hol á eina rimmar jólasølu við serstøkum tilboðum, kappingum og undirhaldi.
Úr rúgvusmiklu skránni, sum handilslívið skipar fyri, kann nevnast skattaveiða, andlitsmáling og ballónir til børn, tónleikur og listaframsýningar í fleiri av handlunum, vælverukvøld í svimjihylinum, søguløtur á bókasavninum og møguleiki at taka ársins jólamynd við familju ella vinum. Og tað er ikki bara í handlunum, at nógv verður á skránni...
Ein stórsligin tónleikauppliving í Løkshøll
Eitt av stóru hæddarpunktunum verður í Løkshøll leygarkvøldið 7. november kl. 20.00, har tónleikaverkið Bylgjan eftir Niclas Johannesen verður framført við ikki færri enn 60 fólkum á pallinum. Verkið varð upprunaliga framført í sambandi við vígsluna av nýggju svimjihøllini Bylgjuni.
Við kóri, blásarum, orkestri, solistum og upprópara verður lagt upp til eina serliga tónleikauppliving. Eftir konsertina verður forkunnugt prát um tónleikalívið á eystara armi á Skálafjørðinum við Hilmari Jan Hansen sum orðstýrara.
Kom og MENN'ist í MEST
MEST bjóðar til opið hús leygardagin 7. november kl. 15.00, og Mourits Mohr, stjóri, fer at greiða frá virkseminum hjá felagnum. Eisini verður spennandi tiltakið Kom og MENN'ist, har sjóneykan verður sett á eitt bæði áhugavert og aktuelt evni: Kópur í Føroyum. Á skránni verða framløgur og orðaskifti um kópin, tónleikur við Sámali Ravnsfjall og góðar smakkroyndir frá OY.
Skrúðgonga við horn- og harmoniorkestrum
Sunnudagin 8. november kl. 16.00 verður býurin eisini karmur um eina festliga skrúðgongu við góðum tónleiki og stemningi við horn- og harmoniorkestrunum GHM, Havnar Hornorkestur og Nes Sóknar Musikkfelag. Ein hugnalig og lívlig uppliving fyri bæði børn og vaksin, sum uttan iva fer at seta sín dám á Býarskáan.
Gøtumatur úr øllum heimsins hornum
Uttanfyri Gulu Smiðju verður aftur í ár eitt stórt og hugnaligt matarøki við matarvognum og smáttum. Her verður møguligt at royna spennandi rættir úr ymiskum heimspørtum – heilt úr Fjareystri til Grikkalands og nógv harímillum.
Góð tilboð og longdar upplatingartíðir
Handlarnir bjóða eina rúgvu av serstøkum tilboðum, og tann vælumtókta stempulkappingin verður sjálvandi eisini á skránni. Vinningurin er – sum altíð – góður!
Handlarnir hava opið frá kl. 10.00 til miðnátt leygardagin og frá kl. 14.00 til 20.00 sunnudagin, so ríkiligt høvi verður at gera góð keyp og njóta býarlívið.
Alt hetta og mangt annað verður á skránni, tá Runavíkin bjóðar til Býarskáa!
Nærri kunning um tiltøk, tilboð og alla skránna fæst á byarskain.fo og á Facebook-síðuni Býarskái í Runavík.
