Svøríki leingir marknaeftirlitið í seks mánaðir frá 12. november. Tað upplýsir svenska løgmálaráðið í einum tíðindaskrivi.

Verandi eftirlit við markini gongur út 11. november, men stjórnin hevur gjørt av at halda fram við tí vegna álvarsligu trygdarstøðuna eftir russisku innrásina í Ukraina.

Stjórnin vísir serliga á samansettar hóttanir og fíggindaligar aktørar, sum ferðast og virka innan fyri Schengenøkið.

Sambært stjórnini er marknaeftirlitið eitt týdningarmikið amboð hjá myndugleikunum til at eyðmerkja innferðandi, sum kunnu vera ein hóttan móti almennum skilhaldi og innlendis trygdini.

Fleiri lond hava marknaeftirlit

Schengensamstarvið fevnir um 25 ES-lond umframt Ísland, Noreg, Liechtenstein og Sveis. Høvuðsreglan er, at fólk kunnu ferðast frítt millum londini uttan at vísa pass við markini.

Londini kunnu tó seta fyribils marknaeftirlit í verk. Svenska stjórnin vísir á, at millum annað Danmark og Noreg eisini hava slíkt eftirlit.

Síðan russisku innrásina í Ukraina í februar 2022 hava myndugleikar kring Evropa boðað frá møguligum russiskum hybridálopum. Talan hevur millum annað verið um ólógliga dronuflúgving og illgruna um njósning.

Kunnu kanna ferðandi um Oyrasund

Marknaeftirlitið merkir millum annað, at svensk løgregla framvegis kann kanna pass hjá ferðandi, sum koma við toki úr Danmark.

Ferðandi fara ikki ígjøgnum eina marknastøð á sjálvari tokleiðini um Oyrasund. Løgreglan kann í staðin kanna passini, tá tokið steðgar á fyrstu støðini svensku megin.

Løgreglan ger eisini stakroyndir av bilførarum, sum koyra um Oyrasundsbrúnna úr Danmark til Svøríkis. Teir kunnu verða bidnir um at vísa pass ella annað samleikaprógv.

Sambært felagnum Øresundsbron er hjá norðurlendskum ríkisborgarum vanliga nóg mikið at vísa eitt koyrikort, sum er útgivið í einum norðurlandi.

Ritzau