Hallgrímur Helgason er millum eyðkendastu og mest fjøltáttaðu listafólk Íslands. Hann er kendur fyri brúsandi skrivistílin, málsligu orkuna og evnini at flætta saman gaman og álvara. Ritverkið fevnir um bæði skaldsøgur, yrkingar, sjónleikir, og av kendastu verkum hansara kunnu nevnast Kvinden ved 1000°, Lejemorderens guide til et smukt hjem, 101 Reykjavík og nýggjastu skaldsøguna Tres kilo solskin.

Ritverkið hjá Helgason er eyðkent við serligari málsligari orku. Ummælarar vísa serliga til hansara hugflog, ríka orðfeingið og at hann so lættliga megnar tað tragiska og skemtiliga í senn. Ritverk hansara er bæði undirhaldandi og letur upp fyri nýggjum áskoðanum á menniskju, samfelag og søgu.

Helgason er ikki einans rithøvundur. Hann er somuleiðis myndlistafólk og sera áhugaður at kjakast um samfelagsviðurskifti. Listaliga fevnir hann tvørtur um fleiri listagreinar. Á Bókadøgum fáa vitjandi høvi betur at síggja báðar síður av hansara listaliga arbeiði, tá Solveig Hanusardóttir Olsen, stjóri á Listasavni Føroya, hittir hann til eitt samtal um bókmentir, myndlist og sambandið millum hesar listagreinir. Tiltakið er ókeypis.

Hallgrímur Helgason, borin í heim í 1959, hevur tríggjar ferðir verið tilnevndur Bókmentavirðisløn Norðurlandaráðsins  og hevur tríggjar ferðir vunnið íslendsku bókmentavirðislønina.