Politiið hevur higartil fingið tríggjar fráboðanir um olju á vegnum.

Talan er í øllum førum um Jóannesar Paturssonargøtu, Grønlandsvegin, Ringvegin og Villingadalsvegin.

– Tað er ræðuliga, ræðuliga hált. Fólk mugu koyra so varliga, sum tey kunnu, sigur vaktleiðarin á politistøðini.

Enn veit politiið ikki, hvaðani oljan stavar.

– Vit kunnu bara gita beint nú. Vónandi er onkur, sum veit, hvat er hent, og kann melda seg sjálvur, sigur vaktleiðarin.

Sløkkiliðið er boðsent og arbeiðir við støðuni. Sambært vaktleiðaranum siga teir, at so mikið hált er á vegnum, at tað er vandamikið at koyra.

Politiið kann heldur ikki útiloka, at olja er á vegunum aðrastaðni í Havn.

– Tað kann saktans vera aðrastaðni eisini, sigur vaktleiðarin.

Bilførarar verða tí bidnir um at koyra sera varliga og vera serliga ansin á teimum nevndu vegunum.