Ein samveldisdómari í USA hevur víst einum ærumeiðingarmáli frá sær, sum forsetin Donald Trump hevði reist móti Wall Street Journal og útgevaranum Rupert Murdoch.
Tað skriva tíðindastovurnar Reuters og AFP.
Trump kravdi tíggju milliardir dollarar í endurgjaldi fyri eina grein um, at hann í 2003 skuldi hava sent dømda kynsbrotsmanninum Jeffrey Epstein eina føðingardagsheilsan.
Heilsanin er skrivað á eina tekning av einari naknari kvinnu, har kynshárini tykjast vera formað sum navnið »Donald«.
Trump hevur staðiliga noktað fyri at hava sent kortið.
Advokatar hansara halda, at greinin er ærumeiðandi. Men dómarin Darrin Gayles gav teimum ikki viðhald.
Trump og advokatar hansara halda eisini, at blaðið átti at slept greinini, eftir at forsetin hevði noktað fyri at hava havt nakað við Epstein at gera. Sambært Reuters staðfestir dómarin tó, at hetta stríðir móti ásetingunum í grundlógini um tíðindafrælsi.
Dómarin vísir eisini á, at Wall Street Journal kannaði málið gjølla, og at journalistarnir royndu at fáa viðmerkingar frá Trump og øðrum embætisfólkum, áðrenn greinin varð prentað.
Darrin Gayles vísti eisini einari fyrru útgávu av málinum frá sær í apríl. Leygardagin gjørdi hann samstundis av, at Trump ikki kann lata inn enn eina broytta útgávu av søksmálinum, skrivar AFP.
/ritzau/
