Tilsamans 1.314 fólk vórðu handtikin í sambandi við mótmæli í Fraklandi í gjár, og 53 løgreglufólk fingu skaða.

Tað upplýsir franska innanríkisráðið í dag sambært tíðindastovuni AFP.

Fyri einari viku síðani mentu mótmæli móti høgum livikostnaði seg til tann ringasta ófriðin í Fraklandi í fleiri ár. Herverk vórðu framd, og handlar vórðu rændir.

Tí vóru myndugleikarnir væl fyrireikaðir til mótmælini hetta vikuskiftið. Tilsamans 70.000 løgreglufólk vóru send á gøturnar kring landið.

Franski innanríkisráðharrin, Laurent Nuñez, segði í gjár, at tað hetta vikuskiftið hevði eydnast myndugleikunum betur at verja millum annað handlar.

Kortini vóru aftur samanbrestir millum løgreglu og mótmælisfólk. Sambært AFP brúkti løgreglan táragass í Paris, Marseille, Lyon, Bordeaux, Lille, Toulouse, Montpellier og Nantes.

Undir mótmælunum vikuna fyri vórðu 2.700 fólk handtikin, og fleiri hundrað handlar vórðu rændir.

Ritzau