Tað er vert at kanna, hvørjir møguleikar eru fyri rúmdarvirksemi í Føroyum.
Tað heldur Jacob Vestergaard, landsstýrismaður, sum hevur svarað einum skrivligum fyrispurningi frá Bjarna Kárasyni Petersen, løgtingsmanni.
Bjarni Kárason Petersen vildi millum annað hava at vita, um landsstýrismaðurin sær møguleikar í einari føroyskari rúmdarvinnu, og hvat hann ætlar at gera fyri at eggja til slíkt virksemi.
Í svarinum vísir Jacob Vestergaard á gongdina í grannalondunum.
– Tað er tó ein sannroynd, at okkara grannalond hava økt um virksemið á hesum økinum seinastu árini. Tað er tískil vert at kanna møguleikarnar fyri rúmdarvirksemi av ymiskum slag í Føroyum, skrivar landsstýrismaðurin.
Eingin føroysk lóggáva á økinum
Ein stórur partur av fyrispurninginum snýr seg um lógargrundarlagið undir møguligum rúmdarvirksemi.
Bjarni Kárason Petersen spyr bæði um virksemið sum heild og um møguleikan at staðseta og reka jarðbundin undirstøðukervi í Føroyum. Talan er annars vegar um útbúnað, sum samskiftir við eindir í ringrás kring jørðina, og hins vegar um útbúnað til at senda lutir í ringrás.
Sambært Jacob Vestergaard er rúmdarvirksemi ikki regulerað í føroyskari lóggávu.
Landsstýrismaðurin upplýsir, at økið verður mett at hoyra undir málsøkið flogferðsla og tí ikki er eitt yvirtikið málsøki.
Donsk lóg er ikki sett í gildi
Í Danmark er rúmdarvirksemi skipað við einari lóg frá 11. mai 2016 um virksemi í ytra rúminum.
Sambært svarinum kann lógin setast í gildi fyri Føroyar við kongligari fyriskipan og við teimum tillagingum, sum føroysk viðurskifti gera neyðugar. Tað er tó ikki gjørt.
Jacob Vestergaard vísir á, at rúmdarvirksemi hevur fylt lítið í politiska kjakinum í Føroyum seinastu árini. Hann metir, at hetta helst er orsøkin til, at danska lógin ikki er sett í gildi her.
Nevnir eingi ítøkilig átøk
Hóast landsstýrismaðurin heldur tað vera vert at kanna møguleikarnar, nevnir hann eingi ítøkilig átøk ella nakra tíðarætlan fyri arbeiðinum.
Hann upplýsir heldur ikki, at ein kanning er sett í verk.
At enda í svarinum vísir Jacob Vestergaard til Ríkisumboðið, tí talan er um danskt málsøki.
Svarið frá Vinnumálaráðnum er dagfest 10. september.
