Maria P. Nólsoy og liðfelagarnir spældu seinnapartin dyst á heimavølli í bestu donsku hondbóltsdeildini móti Ringkøbing.

Frammanfyri 437 áskoðarum í høllini í Frederiksberg vann Keypmannahavn 35-30 á Ringkøbing. Í steðginum var heimaliðið á odda 16-13.

Maria skoraði tvey mál upp á fýra málroyndir, og hon legði upp til trý mál. Harumframt vann Maria liðnum tvey brotskøst.

Hetta var annar sigurin á rað hjá Keypmannahavn, ið er fjórðfremst í deildini við 12 stigum. Esbjerg er fremst við 16 stigum.

Týskvøldið klokkan 20 verður føroyinguppgerð. Tá taka Marita Mortensen og liðfelagarnir í Nykøbing Falster móti Keypmannahavn. Dysturin sæst á TV2 Sport.