Seinnapartin spældu Óli Mittún og liðfelagarnir í GOG dyst á útivølli í bestu donsku hondbóltsdeildini.

Frammanfyri 1.193 áskoðarum í høllini í Helsinge vann GOG 34-28 á heimaliðnum, Nordsjællandi. Í steðginum var heimaliðið á odda 16-15, men í seinna hálvleiki kom var GOG væl betra liðið.

Óli skoraði seks mál upp á átta málroyndir, og hann legði eisini upp til tvey mál, umframt at vinna liðnum eitt brotskast.

GOG er greitt oddalið við 23 stigum fyri 12 dystir. Teir eru seks stig frammanfyri Aalborg, ið tó hevur spælt ein dyst færri.

Vit venda aftur í kvøld við avrikunum hjá Jóhan á Plógv og Skanderborg-Aarhus, Teis Horn Rasmussen og TTH Holstebro, og liðnum hjá Jákupi Egholm og Paula H. Rasmussen, TMS Ringsted, ið øll eru í leiki í dag.