Tað verður munandi dýrari hjá fólki, sum búgva í parkeringsøkinum í miðbýnum í Havn, at hava parkeringsloyvi.

Tórshavnar býráð samtykti á fundinum hóskvøldið at hækka árliga gjaldið fyri parkeringsloyvi úr 780 krónum upp í 1.780 krónur.

Talan er sostatt um eina hækking upp á 1.000 krónur um árið – ella góð 128 prosent.

Í dag kostar eitt parkeringsloyvi 780 krónur um árið, svarandi til 65 krónur um mánaðin. Við nýggja gjaldinum verður kostnaðurin góðar 148 krónur um mánaðin.

Parkeringsloyvini eru ætlað privatpersónum, sum búgva innan parkeringsøkið í miðbýnum og hvørki hava møguleika at parkera á egnum bústaði ella at gera sær egið parkeringspláss. Bert eitt parkeringsloyvi kann verða latið fyri hvønn bústað.

Sambært kommununi eru 174 slík parkeringsloyvi virkin í dag.

Hækkingin er partur av málinum um gjøld fyri íbindingar og tænastur hjá Tórshavnar kommunu.

Á býráðsfundinum varð uppskotið samtykt við átta atkvøðum fyri og fimm ímóti.

Nýggja gjaldið verður galdandi frá 2027.