Christa Pike varð í 1996 dømd til deyða fyri dráp av einum floksfelaga, og í gjár skuldi hon avrættast. Men, hetta gekk ikki, sum myndugleikarnir ætlaðu.
Eftir miseydnaðu royndina at taka hana av døgum, hevur guvernørurin í Tennessee, Bill Lee, gjørt av, at tað verða ikki fleiri avrættingar í Tennessee restina av hesum árinum.
Tað AP-tíðindastovan at siga. Ritzau endurgevur tíðindini, og tað gera fleiri aðrir miðlar kring um heimin eisini. Søgan er, at tað miseydnaðist myndugleikunum í Tennessee at fremja deyðadómin í verki.
- At fremja ein lógligan dóm í verki er millum álvarsligastu uppgávurnar hjá okkum, og fólkið í Tennessee væntar, at hetta verður gjørt á ein hátt, sum ikki bara er lógligur, men eisini effektivur, sigur guvernørurin.
Bill Lee hevur eisini givið boð um, at ein óheft og umfatandi kanning skal gerast av hendingini. Sagt verður, at bert ein onnur avrætting var á skrá í Tennessee restina av hesum árinum, men hon verður so útsett fyribils.
- Christa Pike var frysta kvinnan, sum stóð til at verða tikin av døgum í Tennessee í meira enn 200 ár. Frammanundan var ætlaða avrættingin av henni útsett fleiri ferðir, eftir at ein kærudómstólur hevði biðið um útseting.
Men, seinni hevur hægstirættur gjørt av, at avrættingin kundi fremjast í einum fongsli í býnum, Nashville, mikukvøldið, lokala tíð.
Men, her gekk okkurt galið, tá avrættingin skuldi fremjast, og 50 ára gamla, Christa Pike, var á lívi og snorkaði, eftir at hon hevði fingið tvær skamtanir av eiturevninum, pentobarbital.
Hetta upplýstu advokatar hennara sambært rættarskjølum seint í gjárkvøldið.
- Kvinnan varð tiskil heintað av sjúkrabili og fær viðgerð á sjúkrahúsi, leggja advokatarnir aftrat.
Í fongslinum, har hin 50 ára gamla skuldi avrættast, verður eisini upplýst, at Christa Pike yvirlivdi avrættingarroyndina. Lagt verður aftrat, at tíðindafólk, sum fylgdu ætlaðu avrættingini, siga, at tey hoyrdu kvinnuna snorka hart.
Ógreitt er, hvør støðan er hjá kvinnuni, upplýsir AP.
Sambært útlendskum miðlum siga reglurnar fyri avrætting, at um viðkomandi ikki er deyður eftir fyrstu skamtanina við eituri, skal ein skamtan gevast aftrat. Men, reglurnar siga einki um, hvat skal henda, um viðkomandi tá framvegis er á lívi.
- Christa Pike varð í 1996 dømd til deyða fyri at hava dripið ein floksfelaga, veit Ritzau at siga, sum eisini skrivar um óhugnaligu hendingina í USA.
Myndin her niðanfyri er av tá 18 ára gomlu, Christu Pike, sum grætur, eftir at hon hevur fingið deyðadómin kunngjørdan hin 30. mars í 1998.
