Ein nýggjur býlingur við Hálsatjørn á Strondum veksur skjótt, men hevur onga beinleiðis íbinding í landsvegin. Tí mugu fólk koyra ein umveg gjøgnum bygdina, fram við húsum, har børn spæla.

Tað vísir Helgi Abrahamsen, løgtingsmaður, á í einum skrivligum fyrispurningi til Jacob Vestergaard, landsstýrismann í vinnumálum. Hann spyr, hvat landsstýrismaðurin heldur um ætlanina hjá Sjóvar kommunu at gera eina rundkoyring á Lághálsi, innan fyri Raktanga, so vegurin úr nýggja býlinginum kann bindast í landsvegin.

Sambært løgtingsmanninum hevði ein beinleiðis íbinding gjørt ferðsluna tryggari og leiðina til landsvegin styttri. Sýnið vestureftir er tó avmarkað, og tí er eftir hansara meting neyðugt við eini rundkoyring. Hann vísir á, at Sjóvar kommuna hevur sagt seg vera sinnaða at brekka av eini høvd fyri at bøta um sýnið.

Helgi Abrahamsen biður eisini landsstýrismannin meta um, hvat rundkoyringin fer at kosta, og svara, um hann er sinnaður at virka fyri, at hon verður gjørd.