Minst 68 fólk eru deyð, og 58 hava fingið viðgerð á sjúkrahúsi eftir at tvey háferðartok stoyttu saman nærindis Urda í Toledo-landslutinum í Spania mikumorgunin. Tað upplýsir landslutastjórnin í Castilla-La Mancha.

Vanlukkan hendi umleið klokkan 8.54 sponsku tíð. Eitt tok hjá almenna tokfelagnum Renfe rendi aftan á eitt tok hjá privata felagnum Iryo, sum stóð stilt á skinnarunum. Tvey av vognunum hjá Iryo fóru av sporinum og oman eftir einum skráa.Sambært upplýsingum frá myndugleikunum vóru 397 ferðafólk í Renfe-tokinum og 147 í Iryo-tokinum. Bjargingarfólk leita framvegis í vraklutunum, og talið av deyðum er fyribils.

Spanski samferðslumálaráðharrin, Óscar Puente, sigur, at ein trygdarskipan á tokleiðini steðgaði at virka fyrr um morgunin. Tokini steðgaðu, men Renfe-tokið fekk síðani boð um at koyra víðari, hóast Iryo-tokið framvegis stóð stilt. Hví hesi boðini vórðu givin, verður kannað. Ráðharrin hevur sagt, at tokførararnir ikki hava skyldina.

Tokferðslan á háferðarleiðini millum Madrid og Andalusia er steðgað. Spanski forsætisráðharrin, Pedro Sánchez, hevur vitjað vanlukkustaðið og lovað, at orsøkin til vanlukkuna verður kannað til fulnar.

Hetta er onnur álvarsama vanlukkan á sponsku háferðarskinnarunum í ár. Í januar doyðu 46 fólk í eini tokvanlukku nærindis Adamuz í sunnara parti av Spania.