Soleiðis, sum viðheftu myndir vísa, er líkt til, at bygningin hjá Hiddenfjord á Gomlurætt hevur fingið rættiliga stóran skaða.

At síggja til hevur eldurin eisini gjørt skaðar á onkran trukk og annan útbúnað hjá alifelagnum, sum hevur landstøð her.

Løgreglan fekk fráboðan um eldin um 02-tíðina í nátt. Sløkkiliðið varð boðsent og umleið ein tíma seinni var eldurin sløktur.

Sløkkiliðið var tó framvegis til staðar á Gomlurætt í morgun, tá klokkan var um 08.30, tá viðheftu myndir vórðu tiknar.

Sum skilst, var eingin í bygningnum, tá eldurin kyknaði, og í morgun visti løgreglan ikki at siga, hvør orsøkin er til eldin.