Í kvøld ber til at síggja liðini hjá Óla Mittún og Jóhan á Plógv Hansen spæla dystir í Champions League.
Dystirnir vera vístir beinleiðis á TV3, ið eisini sæst hjá Televarpinum.
Klokkan 17.45 byrjar dysturin í Arena Svendborg í innleiðandi bólki D millum liðið hjá Óla Mittún og Kristianstad úr Svøríki. Fyri átta døgum síðani vann GOG á útivølli 37-32 (17-14) á Kristianstad. So vónirnar undan dystinum eru góðar.
Klokkan 19.45 byrjar dysturin hjá Jóhan á Plógv og liðfeløgunum í Skanderborg-Aarhus í innleiðandi bólki E á útivølli móti franska liðnum, Montpellier. Farna hóskvøld vann Skanderborg-Aarhus á heimavølli 36-32 (15-13) á Montpellier.
Hesir báðir dystirnir kunnu eisini stroymast á Viaplay.
Í kvøld klokkan 19.45 spælir liðið hjá Hákuni West av Teigum, Füchse Berlin dyst á útivølli í innleiðandi bólki A móti Porto. Farna hóskvøld vann Füchse Berlin á heimavølli 40-32 (20-17) á Porto.
Dysturin í Porto kann stroymast á Viaplay.
