Fyrstu føroyingarnir eru nú koppsettir ímóti koronu. Fyrstu prikini vórðu gjørd fyri nýggjár, og nú verður hildið fram at koppseta.
Flestu koppingarevnini, sum verða ment, krevja tvey prik, og sagt verður, at tríggjar vikur skulu ganga ímillum fyrra og seinna prik. Í summum londum ætla tey at hava longri ímillum prikini, men neyðugt er í øllum førum, at fólk fáa tveir skamtar av koppingarevninum.
Koppingarevnið hjá Pfizer/BioNTech, sum verður brúkt í Føroyum, skal geva 95 prosent verju ímóti covid-19. Kravið er, at fólk fáa tveir skamtar, annars er verjan ikki so høg.
Fyrri skamtur gevur eina akutta reaktión í kroppinum, tí kroppurin verjir seg ímóti virus. Eftir fyrsta virusálopið gloyma nógvar sellur virusið og gevast at framleiða andevni ímóti tí. Summar sellur halda fram at framleiða andevni, og tær skulu við seinna skamtinum hava eitt boost, so at sellurnar minnast virusið. Hetta gevur góða og drúgva verju.
Í Føroyum verða fólk koppsett tvær ferðir við trimum vikum ímillum. Danska Heilsustýrið hevur sagt, at tað ber til at hava seks vikur ímillum prikini.
