Talan er um sera truplar samráðingar í semingsroyndini millum arbeiðarafeløgini og arbreiðsgevarar á Hotel Føroyum.
Tað sigur Terji Sigurðsson, semingsmaður.
Hann sigur, at tey sótu saman frá klokkan 15 í gjár til út á náttina, og at samráðingar vórðu tiknar uppaftur í morgun klokkan 10.
– Tað eru truplar samráðingar, og tað gongur spakuliga, sigur Terji Sigurðsson.
– Tað eru smáar flytingar, sum gera, at tað tó er vón fyri at tað kemur ein loysn.
– Eg vænti eisini, at partarnir kenna ta stóru ábyrgdina, teir hava, fyri at finna eina loysn. Tað hevði verið sera óheppið at farið hiðani uttan at vit hava funnið eina nýggja loysn og gjørt ein nýggjan sáttmála, sigur Terji Sigurðsson.
##med2##
Spurdur hvussu nógv gloppið er minkað millum krøvini hjá pørtum, sum in.fo hevur sneytað sær fram til er millum 11 ogt 15 prosent, dregur semingsmaðurin eitt sindur á.
– Tað eru øgiliga smáar flytingar. Eg vil siga, at tað eru mikroskopiskar flytingar. Hetta er øgiliga trupult, sigur Terji Sigurðsson.
Partarnir sita hvør í sínum rúmi á hotellinum. Og so verður gingið í millum partarnar.
– Jú, tað er er aktivitetur í alla tíðina, og vit hava longu nú lagt fleiri uppskot fyri partarnar, og vit royna nú at fáa gongd á, sigur semingsmaðurin.
Hann sigur, at tey koyra út í eitt, og hann væntar, at í dag verður tað út á náttina, og so verður hildið fram í morgin.
– Eg síggi ikki fyri mær nakra semju beint nú. Um eg skal vera ræðuliga positivur, so síggi eg ikki eina loysn fyri mær í dag. Men vit verða bara noyddir at hanga í, til tað gleppur, sigur Terji Sigurðsson.
