Tíðindaskriv:

Títtleikin fyri barnagikt í Føroyum er høgur. Tá eitt barn fær staðfest barnagikt, verður alt lívið hjá familjuni vent á høvdið. Tað er ein stór kollvelting at byrja við heilivági, fylgja við hjáárinum og at hava regluligar vitjanir á sjúkrahúsi. Kanningar, skanningar, prát, eygnalækna‑kanningar, vaccinir og blóðroyndir gerast ein partur av gerandisdegnum.

Gerandisdagurin verður brádliga meira krevjandi. Tí ynskja vit at skapa eitt stað, har familjur sum hava barn við gikt, kunnu møtast, tosa saman og kenna seg minni einsamallar.

Vit hittast í Róðarneystinum í Miðvági, leygardagin 26. september frá klokkan 13.00 til 16.00. Tiltakið er fyri børn og ung, sum hava gikt, og fyri foreldur og systkin. Í róðrarneystinum er pláss at hugna okkum saman, vit fara spæla borðspøl, tað er eisini møguleiki at venja á maskinunum. Um veðrið er gott, fara vit útum at grilla skumfidusar.

Vit bjóða drekkamunn við onkrum afturvið. Tað er góður møguleiki hjá teimum vaksnu at fáa eitt kaffiprát – um gerandisdagin við barnagikt, ella bara um lívið annars.

Endamálið er einfalt: at vit kunnu heilsa uppá hvønn annan. Hvørji eru tit, sum hava barn við gikt? Kom og sig hey – vit gleða okkum at møta tykkum.

Vit síggjast í Róðrarneystinum í Miðvági, leygardagin 26.sept. frá kl. 13.00 til 16.00. Tiltakið er ókeypis.

Gott um tit melda til á Facebook‑eventinum: ”Saman um gerandishetjur. Børn og ung sum hava gikt og tykkara familjur.”

Ella við at venda tykkum til Jonnu Hansen, Tóru Mouritsen ella Olgu Skorastein.