Hanus Sørensen var á vøllinum í 88 minuttir, tá hann og liðfelagarnir í NK Aluminij Kidričevo á útivølli megnaðu javnleik 2-2 móti oddaliðnum í bestu slovensku fótbóltsdeildini, NK Maribor.

Aluminij hevði ein 2-1 sigur í pottinum, men í 97. minutti fekk heimaliðið eitt brotsspark, ið teir gagnnýttu.

Heimaliðið legði seg á odda 1-0 miðskeiðis í fyrra hálvleiki. Tíðliga í seinna hálvleiki javnaði Petar Petriško til 1-1. Tá klokkan vísti 80 minuttir fekk Vito Težak Aluminij á sigurskós, men tað helt tíverri ikki.

Undan landsliðssteðginum hevur Aluminij 13 stig fyri 10 dystir, og teir eru fimtfremst í deildini.