Pólska verjan hevur tikið eina russiska dronu upp úr Eystursjónum - ikki langt frá pólsku strondini.
Dronan varð funnin nær frítíðarbýnum - ella baðibýnum - Rusinowo í útnyrðingspartinum av Póllandi.
- Fyribils metingar benda á, at hetta er ein hernaðardrona við russiskum uppruna, skrivar pólski verjumálaráðharrin, Władysław Kosiniak-Kamysz, á X, fyrrverandi Twitter.
Eitt talsfólk hjá pólsku verjuni upplýsir, at talan helst er um eina dronu av slagnum, Gerbera.
Eftir sum pólska loftverjan ikki hevur skrásett brot á pólskt loftrúm síðan hin 30. juli, kann tað hugsast, at dronan er komin úr altjóða sjógvi og inn í pólskan sjógv.
Serfrøðingar kanna nú, um spreingievni eru í dronuni.
Pólland, sum kennur seg hótt av Russlandi, er limur bæði í ES og verjusamgonguni, Nato, og er ein týdningarmikil sameindur hjá Ukraina.
Sunnudagin varð eitt ferðafólkatok, sum var á veg úr Kyiv í Ukraina til Warszawa í Póllandi, rakt í russiskum dronuálopi - beint við markið til Póllands.
