Gabriel García Márquez var 87 ára gamal, nú hann doyði. 　 Hann búði í útlegd í tíggju ár í 1960-unum og 1970-unum, og tað var undir útlegdini í Meksiko, at hann skrivaði skaldsøguna, ið á donskum hevur heitið "Hundrede års ensomhed", sum kom út í 1967, og sum gjørdi hann kendan víða um heimin. Millum verkini, sum komu úr hansara hondum seinni, kunnu nevnast "At leve for at fortælle", sum kom í 2002, og "Erindring om mine bedrøvelige ludere", sum kom tvey ár seinni. 　 Í 1982 fekk Gabriel García Márquez bókmentavirðislønin Nobels. 　 Fleiri núverandi og fyrrverandi leiðarar minnast Gabriel García Márquez við stórari virðing, teirra millum fyrrverandi amerikanski forsetin Bill Clinton, sum kendi hann væl. Kolombiski forsetin, Juan Manuel Santos umrøður Márquez sum tann størsta landsmannin nakrantíð, og meksikanski forsetin, Enrique Peña Nieto, sigur, at Gabriel Garcia Márquez setti sítt sermerki á mentanina í okkara tíð.