Altjóða havrannsóknarstovnurin ICES mælir til, at makrelveiðan í 2027 verður í mesta lagi 352.938 tons. Tað er meira enn tvífalt so nógv sum tilmælið fyri í ár, sum er 174.357 tons.
Tað upplýsir Havstovan í dag.
Stóra hækkingin kemst av, at gýtingarstovnurin av makreli aftur er komin upp um lívfrøðiliga markvirðið, sum verður nevnt Blim. Sambært Havstovuni eru tey víðgongdu verjutiltøkini, sum vórðu sett í verk í fjør, tí ikki longur neyðug.
Svartkjaftur hækkar 25 prosent
Fyri svartkjaft mælir ICES til eina veiðu á 1.064.191 tons næsta ár. Tað er 25 prosent meira enn tilmælið fyri 2026.
Orsøkin er góð tilgongd frá 2024-árganginum, sum nú er vorðin partur av gýtingarstovninum.
Tilmælið fyri norðhavssild hækkar 10 prosent, úr 533.914 tonsum í ár upp í 588.004 tons í 2027.
Fiskaslag | Tilmæli 2026 | Tilmæli 2027 | Broyting |
Makrelur | 174.357 tons | 352.938 tons | +102 prosent |
Svartkjaftur | 851.344 tons | 1.064.191 tons | +25 prosent |
Norðhavssild | 533.914 tons | 588.004 tons | +10 prosent |
Byggir á altjóða kanningar
Tilmælini byggja á stovnsmetingarnar fyri 2026, sum vórðu gjørdar á altjóða fundi í Keypmannahavn frá 26. august til 1. september.
Millum grundarlagið eru úrslit frá altjóða kanningunum av svartkjafti, sild og makreli, sum føroyska rannsóknarskipið Jákup Sverri tekur lut í.
Tølini eru vísindalig tilmæli um samlaðu veiðuna úr stovnunum og eru sostatt ikki føroyskar kvotur.
Kelda: Havstovan.
