Hagstovan skrivar, at Fólkanæturnar settu met í summar. Fólkatali telur, hvussu nógvar nætur gestir gista. Um 2 fólk gista 3 nætur, eru hetta 6 fólkanætur

Gestirnir gistu stívliga 112.000 nætur á føroysku gistingarhúsunum, sum er knappliga 10.200 fleiri enn summarið í fjør.

Gestirnir vóru eisini fleiri í tali, úr góðum 38.600 upp í 40.700. Tað eru 2.100 fleiri gestir enn summarið í fjør, og soleiðis økt fimm prosent. 

Størri vøkstur uttan fyri Suðurstreymoyar økið

Vøksturin í fólkanætum hevur verið størri uttanfyri Suðurstreymoyar økið enn í Suðurstreymoyarøkinum í summar samanborið við í fjør. Í summar vóru nærum 20.600 fólkanætur uttanfyri Suðurstreymoyar økið. Tað eru 5.800 fleiri enn summarið í fjør og økt næstan 40 prosent. 

Í Suðurstreymoyar økinum vóru 4.400 fleiri fólkanætur samanborið við summarið í fjør, sum er fimm prosent fleiri.

Nýtslustigið vaks, hóast størri rúmføri 

Í summar var nýtslustigið fyri kamarsnætur 86,4 prosent. Í fjør summar var nýtslustigið 82,8 prosent. Nýtslustigið fyri kamarsnætur vaks sostatt eitt vet við 3,6 prosentstigum. Kamarsnæturnar fóru úr 59.600 til 66.600. Tað eru 7.000 fleiri enn summarið í fjør, ið er ein øking á 12 prosent. 

Nýtslustigið fyri kamarsnætur var eitt vet hægri, eisini hóast rúmføri fyri kamarsnæturnar øktist hetta tíðarskeiðið. Í summar vaks rúmførið á føroysku gistingarhúsunum úr 72.000 til 77.150 kamarsnáttum. Rúmførið øktist sostatt við góðum 7 prosentum, sum fyrst og fremst kemst av, at nýtt gistingarhús lat upp í Klaksvík í summar.