Í vikuni kom Grønlands Politi við einari fráboðan, har tey eftirlýstu tvey ung fólk í Nuuk - við bæði nøvnum og myndum.
Í morgun visti løgreglan at siga, at síðstu nátt vórðu bæði funnin deyð.
Tað vóru sjálvboðin, sum høvdu leitað eftir teimum báðum eftirlýstu, sum settu seg í samband við Grønlands Politi.
Tey høvdu funnið eitt hvørt, sum tey hildu vera illgrunavert og sum tey sjálvi ikki vildu kanna nærri. Tí settu tey seg í samband við løgregluna.
Grønlands Politi sigur tó einki ítøkiligt um, hvat tað var, sum fekk tey sjálvbodnu at venda sær til løgregluna.
Vaktleiðarin, Poul Kreutzmann, sigur, at illgruni er ikki um, at nakað brotsverk er framt.
Sambært Grønlands Politi ynsktu tey sjálvbodnu ikki at kanna nærri tað, tey sóu og settu seg í samband við løgregluna klokkan 00.59 síðstu nátt.
- Vit fóru á staðið, og her varð staðfest, at talan var um tey bæði, sum vit hava eftirlýst, sigur Poul Kreutzmann.
Vaktleiðarin leggur aftrat, at sambært teimum kanningum, sum higartil eru gjørdar av líkunum, bendir einki á nakað brotsverk.
- Hetta er sjálvsagt ein sorgarleikur, og tey avvarðandi hava fingið boðini, sigur Poul Kreutzmann við Sermitsiaq.
Lesið eisini: Eftirlýsingin hjá Grønlands Politi
