Leo pávi hevur atkvøtt á amerikanska miðskeiðsvalinum, sum verður týsdagin í næstu viku.

Tað boðar Vatikanið frá fríggjadagin, skrivar Ritzau.

Sambært tíðindaskrivstovuni hjá Vatikaninum hevur pávin sum amerikanskur ríkisborgari brúkt sín atkvøðurætt og greitt brævatkvøðu í Chicago.

Ikki verður upplýst, hvørjum hann hevur atkvøtt fyri.

71 ára gamli pávin varð føddur í Chicago og fekk navnið Robert Francis Prevost. Í mai 2025 gjørdist hann ovasti leiðari í katólsku kirkjuni og tók navnið Leo XIV.

Hann er fyrsti amerikanski pávin, men viðurskiftini við amerikansku stjórnina hjá Donald Trump hava ikki verið snikkaleys.

Undir amerikanska krígnum í Iran hevur pávin talað fyri friði. Hann hevur eisini talað ímóti hóttanini hjá Trump fyrr í ár um at oyðileggja iransku sivilisatiónina.

Trump hevur hinvegin á sosialum miðlum kallað pávan veikan, tá tað snýr seg um kriminalitet.

– Eg vil ikki hava ein páva, sum heldur, at tað er í lagi, at Iran hevur kjarnorkuvápn, hevur amerikanski forsetin eisini skrivað.

/ritzau/