Vinningurin hjá týska bilframleiðaranum Audi minkaði við 87 prosentum í triðja ársfjórðingi í ár.

Orsøkin er minkandi eftirspurningur í Kina, økt kapping og tollur í USA.

Vinningurin minkaði niður í 95 milliónir evrur í triðja fjórðingsári - úr 718 milliónum evrum í sama fjórðingsári í fjør.

Níggju teir fyrstu mánaðirnar í ár hevði Audi ein vinning á 1,22 milliardir evrur av einum umsetningi á 42 milliardir evrur.

Bæði hesi tølini eru ein stór afturgongd í mun til somu tíð í fjør.

Afturgongdin merkir fíggjarligir trupulleikar hjá Audi, sum hoyrir til VW-samtakið.

Samtakið fevnir eisini um Lamborghini, Bentley og motorsúkluframleiðaran, Ducati.

Hetta veit norska kringvarpið - NRK - at siga í morgun.