Ray á Roks vann silvur við skerpikjøti og sjópylsu á pizzuni

Ray YeowZz við steypinum fyri annaðplássið í gourmetpizza á Pizza Champion Cup International í Göteborg. Hann starvast á Roks í Havn og brúkti millum annað skerpikjøt og sjópylsu úr Føroyum á pizzuni.

Ray á Roks vann silvur við skerpikjøti og sjópylsu á pizzuni Ray á Roks vann silvur við skerpikjøti og sjópylsu á pizzuni

Ray YeowZz, kokkur á Roks í Fútastovu í Havn, vann annaðplássið í heimsmeistarakapping fyri pizza í Göteborg. Føroyskar rávørur vóru við til at geva pizzuni sín serliga dám.

Eirikur Lindenskov

16. september 2026 kl. 20:13

Skerpikjøt og sjópylsa vóru millum rávørurnar á pizzuni, sum tryggjaði Ray YeowZz silvur í Pizza Champion Cup International í Göteborg í gjár.

Ray, sum starvast sum kokkur á Roks í Havn, vann annaðplássið í bólkinum International Nordic Gourmet Pizza Star Chef 2026 – Michelin Class.

– Eg brúkti skerpikjøt og sterkan hunang, umframt sjópylsu úr Føroyum, greiðir Ray frá.

Eisini føroyskar urtir vóru á pizzuni, sum hann borðreiddi við fyri dómarunum.

Kappaðist við vinnarar frá í fjør

Ray greiðir frá, at tríggir vinnarar frá kappingini í fjør kappaðust um heiðurin.

Á myndunum frá kappingini sæst hann arbeiða við deigginum og síðani leggja lidnu pizzuna fyri dómararnar, sum smakka og meta um hana.

Tá avtornaði, slapp hann á heiðurspallin at taka ímóti steypi og diplomi fyri annaðplássið.

Pizza Champion Cup International varð hildin á Svenska Mässan í Göteborg í sambandi við matvinnumessuna FFCR. Kappast varð í fleiri bólkum, og Ray vann sostatt silvur í gourmetbólkinum við heitinum Star Chef 2026 – Michelin Class.