Tað verður ikki í hesum umfari, at løgreglan, ákæruvaldið og brotsmálaumsorganin verða tikin undir føroyskt ræði, um tilmælið frá meirilutanum í Uttanlandsnevndini verður fylgt.
Seks tingfólk úr Tjóðveldi hava lagt uppskot fyri Løgtingið um at broyta ræðislógina, so hesi málsøki kunnu yvirtakast.
Uppskotssetararnir eru Høgni Hoydal, Sirið Stenberg, Hervør Pálsdóttir, Eirikur í Jákupsstovu, Liljan Weihe og Bjørg Brynhildardóttir Egholm.
Men meirilutin í Uttanlandsnevndini mælir frá at fremja yvirtøkuna nú.
Nýggj frágreiðing kemur í 2027
Landsstýrið arbeiðir við at dagføra frágreiðingina frá 2003 um møguleikarnar fyri at taka løgregluna og rættarskipanina undir føroyskt ræði.
Arbeiðið verður væntandi liðugt í 2027.
Tað merkir, at ein nýggj og dagførd meting av bæði fíggjarligum, umsitingarligum og løgfrøðiligum viðurskiftum skal liggja á borðinum, áðrenn støða verður tikin til eina møguliga yvirtøku.
Tjóðveldi og Framsókn hava undir viðgerðini víst á møguleikan at seta 2030 sum mál fyri yvirtøkuni.
Kostar 181 milliónir um árið
Ein av stóru spurningunum er kostnaðurin.
Sambært upplýsingum frá ríkisløgregluni eru árligu útreiðslurnar til løgreglu og ákæruvald í Føroyum 181,3 milliónir krónur.
Henda upphædd er tó ikki neyðturviliga tað sama sum samlaði kostnaðurin av eini føroyskari yvirtøku.
Við eini yvirtøku skulu føroyskir myndugleikar eisini taka støðu til millum annað útbúgving, serkunnleika, KT-skipanir, útgerð og samstarv við løgreglumyndugleikar í øðrum londum.
Vilja hava føroyskt ræði
Endamálið við uppskotinum hjá teimum seks tingfólkunum úr Tjóðveldi er at fáa lóggávuvaldið og útinnandi valdið á hesum økjum flutt til føroyskar myndugleikar.
Løgreglan og ákæruvaldið eru í dag undir donskum myndugleikum, hóast virksemið fer fram í Føroyum.
Málið hevur verið umrøtt í nógv ár. Longu í 2003 varð ein frágreiðing gjørd um, hvat krevst fyri at taka rættarskipanina og løgregluna á føroyskar hendur.
Uppskotið, sum nú er til viðgerðar, er løgtingsmál nr. 24/2026.
Tað er sostatt framvegis politisk ósemja um, nær og um Føroyar skulu taka ábyrgdina av løgregluni og ákæruvaldinum, og hvørjar fyrireikingar skulu vera gjørdar frammanundan.
