From Harbour to Harbour er eitt verk um vatn, men vatnið hoyrist ongantíð beinleiðis. Tað er heldur ein ósjónlig tilvera undir tónleikinum, eitt evni, vit øll eru samantvinnaði við og treytað av. Verkið bjóðar lurtaranum á eina ferð gjøgnum eina ritualistiska gongd, har ljóð og tekstur flyta seg millum tað kropsliga, tað planetariska og tað kosmiska, og renna saman.

Verkið er í tíggju satsum og er komponerað av Onnu Katrin Egilstrøð til NJYD fyri tvørfloytu, saxofon, gittara, slagverk, rødd og elektronikk. Elektronisk ljóð og viðgjørdar field recordings av eitt nú stormi, menniskjahavi og ultraljóði flættast saman við klanginum hjá ensembleinum og skapa eitt skiftandi ljóðlandslag.

Tekstirnir eru poetiskar umskrivingar av mashups, sum eru gjørd úr ymiskum vísindaligum og fagligum tekstum, eitt nú lívfrøðiligum frágreiðingum, skapanarsøgnum og tekstum um vatn í rúmdini. Soleiðis møtast ymiskir mátar at skilja heimin í verkinum: tað vísindaliga og tað mytiska, tað menniskjaliga og tað kosmiska.

Tær instrumentalu stemmurnar eru mentar í tøttum samstarvi við tónleikararnar í NJYD.