Í dag vita norskir miðlar at siga, at norski fíggjarmálaráðharrin, Jens Stoltenberg, hevur sagt starvið frá sær sum leiðari fyri trygdarráðstevnuni í München.
Millum miðlarnar, sum bera hesi tíðindi fyrrapartin, er Dagens Næringsliv.
- Fyri meg hevur tað størri týdning at vera fíggjarmálaráðharri í Noregi enn at vera leiðari í München.
Jens Stoltenberg leggur aftrat, at hann er fegin um politiska arbeiðið í Noregi, og tað er her, hann vil brúka sína arbeiðsorku.
Maðurin, sum í fleiri ár var Nato-aðalskrivari, hevur eisini verið norskur forsætisráðharri - árini 2000–2001 og aftur árini 2005–2013.
Í tíggju ár - árini 2014 til 2024 - var hann Nato-aðalskivari, og hann var eisini Nato-aðalskrivari, tá Russland leyp á Ukraina.
