Í morgun upplýsir norska løgreglan, at tey fara at taka støðu til, hvørt leiting skal setast í verk aftur í royndini at finna tey trý ferðafólkini, sum enn ikki eru komin afturíaftur eftir bátsvanlukkuna við Averøy fríggjadagin.

Tað var um morgunin henda dagin, at fýra útlendsk ferðafólk høvdu leigað sær ein bát og vóru farin út at fiska. Tá kvøldið kom, og tey ikki vóru komin aftur at landi, varð farið at leita. Tá var myrkt og líkindini at leita vóru vánalig.

Skip og tvær tyrlur vórðu send avstað, og sum náttin leið, varð báturin, sum tey fýra høvdu verið í, funnin holvdur. Ein av teimum saknaðu varð eisini funnin sjólátin. Hini trý, sum vóru við bátinum, eru framvegis ikki komin afturíaftur.

Stór leiting var á leiðini, har báturin holvdist og sakk, og leitað varð eisini leygardagin. Síðan hevur steðgur verið í, men nú umhugsar norska løgreglan, um leitingin skal takst uppaftur í royndini at finna onkran av teimum trimum, sum framvegin eru saknað.

Seinnapartin í gjár segði norska løgreglan, at nú verður ikki longur leitað eftir fólki á lívi, men eftir líkunum av teimum, sum enn ikki eru funnin. Mett verður ikki, at nakar kann vera á lívi eftir herviligu bátsvanlukkuna fríggjadagin.

Sambært norska kringvarpinum NRK vóru tey fýra í leigaða bátinum úr Kekkia, og tey vóru partur av einum ferðalag á átta, sum vóru komin til Noregs at ferðast saman, harav tey fýra vóru farin út at fiska í leigaðum báti fríggjadagin.

Norskir miðlar vita at siga, at tá leigaði báturin, sum tey fýra høvdu verið í, varð funnin holvdur, var hann heilur, men hann fór í tvey, tá roynt varð at taka hann upp úr sjónum.