Nú verður ikki longur leitað eftir fýra útlendsku ferðafólkunum á lívi, sum fríggjamorgunin fóru út at fiska við einum leigaðum báti í Averøy í Møre og Romsdal í Noregi.
Tá dagurin leið, og tey ikki vóru komin aftur at landi, soleiðis sum avtalað, varð stór leiting sett í verk. Seinni varð báturin, sum tey høvdu verið í, funnin tómur og holvdur.
Tað hevur ikki eydnast at finna nakran av teimum, sum vóru við bátium, og nú verður ikki longur leitað eftir fólki á lívi, veit norska kringvarpið NRK at siga fyrrapartin.
Sambært átaksleiðaranum hjá Høvuðsbjargingarstøðini í Noregi, Espen Andersen, hevur báturin, sum er funnin, fingið skaðar, men hann var heilur - og koppaður - tá hann varð funnin.
- Skaðarnir, sum báturin hevur fingið, komu, tá báturin varð lyftur upp úr sjónum, sigur Espen Andersen hjá norsku Høvuðsbjargingarstøðini.
Dagføring:
Seinastu tíðindini úr Noregi eru sambært norska kringvarpinum NRK, at ein av teimum saknaðu er funnin sjólátin.
Lesið eisini - Báturin funnin tómur
https://in.fo/grein/leiting-eftir-fyra-folkum-baturin-funnin-tomur
