Umboðsmannatingið í USA hevur samtykt ein víðfevndan pakka við revsitiltøkum og tolli, sum skal økja fíggjarliga trýstið á Russland.

Tað skrivar tíðindastovan Reuters.

262 limir atkvøddu fyri uppskotinum, meðan 159 atkvøddu ímóti.

Senatið, sum er hitt kamarið í amerikonsku Kongressini, samtykti lógaruppskotið í august. Tað verður nú sent Donald Trump forseta til undirskrivingar.

Trump hevur sambært tíðindastovuni AFP áður sagt, at hann fer at skriva undir uppskotið.

Talan er sambært AFP og Reuters um mest víðfevnda amerikanska lógpakkan móti Russlandi, síðan Trump kom aftur í Hvítu húsini í januar í fjør.

Tiltøkini eru vend móti russiska orku- og verjuídnaðinum, Vladimir Putin forseta og øðrum høgtstandandi russiskum embætisfólkum.

Russiski skuggaflotin av tangaskipum, sum verður brúktur til at sleppa undan vesturlendskum revsitiltøkum, verður eisini raktur.

Lógin gevur harumframt amerikanska forsetanum heimild til at leggja upp í 100 prosent í tolli á stórar keyparar av russiskari olju og gassi.

Lógaruppskotið møtti stórari mótstøðu, tá republikanski senatorurin Lindsey Graham legði tað fram í apríl 2025.

Lindsey Graham doyði brádliga av hjartatrupulleikum fyrst í juli. Stutt eftir gav Trump republikansku leiðarunum í Kongressini grønt ljós til at leggja uppskotið til atkvøðugreiðslu.

– Hetta hevur ómetaliga stóran týdning fyri meg, og tað hevði eisini ómetaliga stóran týdning fyri Lindsey, sigur republikanski senatorurin Darline Graham sambært Reuters.

Darline Graham er systir Lindsey Graham og hevur tikið við sessi hansara í Senatinum.

Lindsey Graham var ein týðiligur stuðul hjá Ukraina. Stutt undan andlátinum var hann komin aftur úr Ukraina, har hann hevði fund við ukrainska forsetan, Volodymyr Zelenskyj.

Russland gjørdi innrás í Ukraina í februar 2022. Síðan hava londini verið í kríggi í tí, sum Reuters lýsir sum blóðugasta kríggið í Evropa síðan seinna heimsbardaga.

/Ritzau/