Kappingarráðið hevur góðkent yvirtøkuna hjá P/f Wenzel av ognunum hjá Sp/f Komfortbilum og Sp/f NN Finans.

Yvirtøkan fevnir millum annað um bilar, goymslu, útgerð, eykalutir og atgongd til leigumálið hjá Komfortbilum. Wenzel hevur eisini yvirtikið starvsfólk og fingið avtalu um at gerast góðkent BMW-verkstað í Føroyum.

Kappingareftirlitið metti tó upprunaliga, at yvirtøkan fór at forða munandi fyri virknari kapping á føroyska bilmarknaðinum. Serliga vóru ivamál um søluna av nýggjum premiumbilum – sum eru bilar í dýrara og meira eksklusiva partinum av bilmarknaðinum.

Uttan eina nøktandi tilsøgn frá Wenzel ætlaði eftirlitið tí at mæla Kappingarráðnum til at nokta yvirtøkuna.

Sleppur Volvo

Loysnin varð, at Wenzel tann 15. oktober bant seg til at gevast við sínum Volvo-virksemi, um yvirtøkan av Komfortbilum varð góðkend.

Wenzel skal siga søluumboðið við Volvo upp og bindur seg samstundis til ikki at selja nýggjar ella brúktar Volvo-bilar í trý ár. Ávís undantøk eru tó fyri Volvo-bilar, sum longu vóru bílagdir, og fyri bilar, sum verða tiknir í býti í sambandi við aðra bilsølu.

Felagið kann fyribils reka Volvo-verkstaðið víðari, til ein nýggjur veitari hevur fingið góðkenning sum Volvo-verkstað. Verkstaðsavtalan skal tó sigast upp skjótast gjørligt og í seinasta lagi eitt ár eftir, at tilsøgnin er vorðin bindandi, um Kappingareftirlitið ikki leingir freistina.

Ein nýggjur Volvo-veitari skal eisini kunna keypa serútgerðina hjá Wenzel fyri ein marknaðarprís, sum Kappingareftirlitið góðkennir.

Stórur partur av marknaðinum

Kappingareftirlitið vísir á, at føroyski bilmarknaðurin er vorðin alsamt meira miðsavnaður.

Marknaðarparturin hjá Wenzel á samlaða marknaðinum verður mettur at vaksa úr 20–30 prosentum upp í 30–40 prosent eftir yvirtøkuna. Tríggjar tær størstu bilasølurnar fara tá at hava tilsamans 70–80 prosent av marknaðinum.

Sambært eftirlitinum hevði Wenzel uttan treytina komið at selt trý premiumbilmerki. Við yvirtøkuni varð kappingartrýstið frá BMW-virkseminum hjá Komfortbilum savnað hjá einum felag, sum longu stóð sterkt á marknaðinum.

Eftirlitið metti eisini, at aðrar bilasølur vóru áhugaðar í ognunum hjá Komfortbilum. Tí tók tað ikki undir við, at ognirnar og BMW-virksemið høvdu horvið av marknaðinum, um Wenzel ikki hevði keypt tey.

Yvirtøkan varð framd undan góðkenning

Avgerðin vísir eisini, at Wenzel hevði framt yvirtøkuna, áðrenn hon varð góðkend av kappingarmyndugleikunum.

Kappingareftirlitið umhugsaði tí bæði at nokta yvirtøkuna og at geva boð um at ógilda avtalurnar, so marknaðarstøðan kundi verða endurskapað.

Tá Wenzel bant seg til at gevast við Volvo-virkseminum, metti eftirlitið kortini, at kappingarligu ivamálini vóru loyst á nøktandi hátt.

Kappingarráðið góðkendi tí yvirtøkuna á fundi 16. oktober – við tilsøgnini frá Wenzel sum bindandi treyt.

Avgerðin kann lesast her.