Volodymyr Zelenskyj, forseti í Ukraina, kom týsdagin til Noregs at umrøða kríggið og støðuna hjá Ukraina.

Í Oslo hittir hann Jonas Gahr Støre, forsætisráðharra í Noregi, og Alexander Stubb, forseta í Finnlandi. Amerikanski serligi sendimaðurin Steve Witkoff tekur eisini lut í samráðingunum, meðan Jared Kushner verður við umvegis netið.

Tað er Zelenskyj, sum hevur biðið Noreg og Finnland skipa fyri fundinum. Sambært Støre er málið at fáa diplomatisku royndirnar at enda kríggið inn á eina meira konstruktiva leið.

– Vit vilja arbeiða fyri, at kríggið kann enda á diplomatiskan hátt og við einum varandi og rættvísum friði. Sum støðan er nú, er neyðugt, at partarnir hittast, segði norski forsætisráðharrin undan fundinum.

Samráðingarnar fara millum annað at snúgva seg um loftverjuna hjá Ukraina og felags framleiðslu av vápnum. Zelenskyj hevur sagt, at Ukraina hevur stóran tørv á fleiri rakettum til amerikonsku Patriot-loftverjuskipanirnar.

Vitjanin er samstundis, sum Russland heldur fram við álopum á ukrainskar býir og borgarlig mál. Níggju fólk lótu týsdagin lív í einum nýggjum russiskum rakett- og dronuálopi, sambært ukrainskum myndugleikum.

Umframt politisku fundirnar fór Zelenskyj í audience í kongshøllini. Hann skal eisini hitta forsetan í Stórtinginum og parlamentarisku leiðararnar.

Ein felags tíðindafundur við Zelenskyj, Stubb og Støre verður klokkan 19.15 í kvøld, upplýsir norska forsætismálaráðið.